Ponteceso, no máis interior da ría de Laxe e Corme, veu nacer en 1835 ao autor do Hino nacional galego. Licenciado en Medicina, Eduardo Pondal preferiu o camiño das letras ao exercicio da súa carreira profesional. O Bardo de Bergantiños foi, xunto Rosalía e Curros, egrexia figura do Rexurdimento e ilustre poeta da raza, cuxa obra poética constitue un tesouro da literatura galega. A súa casa natal encóntrase á beira do Anllóns, desde onde o poeta recibía inspiración fitando á atlántica natureza e ás súas xentes. 
 

Pódense recrear os paseos do sobranceiro Bardo, homenaxeado anualmente no Simposio Pondaliano, camiñando ata as quilométricas dunas do Monte Branco. Este ecosistema de orixinal feitura e beleza continúa ata a recollida praia de Balarés, onde se atopa o peirao para o transporte de wolfram na II Guerra Mundial. O espacio natural do Monte Branco posúe un grande valor ecolóxico por mor da súa riqueza ornitolóxica e piscícola, como refuxio de aves migratorias e como couto de angula, lamprea, reo, salmón e troita. 

Ponte-Ceso é célebre polo seu bó xantar : sonlle pratos reputados as angulas, a lamprea, o percebe de Corme, e a faba de Trabe, ofrecidas aos visitantes en correspondentes celebracións gastronómicas. A vila acolle asemade outras festividades, relixiosas como a Barquiña ou o Carme, ou deportivas como a concentración internacional de motos, celebrada desde hai 10 agostos en Balarés. 

As terras de Ponte-Ceso dan conta dunha abondante e rica arquitectura civil e relixiosa. No tocante á primeira, compre subliñar o Pazo de Amarelle en Nemeño, o lugar do Couto, o Pazo de Pondal, e a nova ponte de 1846, que viu substituir á antiga, como lembra unha doazón do Rei Fernando II en 1175 referíndose ao flumen de Cesso (o río Anllóns recibe un nome diferente dependendo do seu treito : Ceso, Anllóns, Grande e Carballo). 

Na arquitectura relixiosa, destacan as igrexas de San Fins de Anllóns e de San Tiso de Cospindo. A igrexa de San Martiño de Cores ten unha porta románica do séc.XII, e a de San Vicencio da Graña conserva algunhas pedras do antigo mosteiro céltigo de Almerezo, fundado por San Rosendo no ano 867. 

Para saberes máis de Ponteceso : 
Concello de Ponteceso : Concello, 18 / 981 71 40 00 

Onde comer, durmir e pasalo ben:
Hostal Teyma