Información ofrecida por Radio Nordés

Entre o 5 e o 8 de agosto celebrouse a terceira edición da Peregrinación polo Camiño Xacobeo a Fisterra e Muxía, que foi organizada, un ano máis, pola asociación supramunicipal Neria. O seu presidente, Plácido García, considerou un éxito esta edición do camiño, á que se apuntaron preto de douscentos peregrinos, se ben tivo en Fisterra o seu punto de máis afluencia, chegando a convocar, segundo a organización, a máis de 350 persoas.

A peregrinación, que saiu o xoves de Santiago de Compostela, despois de que os participantes asistisen á Misa do peregrino, rematou o domingo co treito entre Fisterra e Muxía. Para Plácido García, este é o máis atractivo do camiño xa que ten por marco o litoral da Costa da Morte, "algo que foi moi agradecido polos participantes, que puideron ve-lo mar despois de camiñar moitos quilómetros polo interior". Para o presidente de Neria, isto confirmou que "o camiño é o mellor escaparate turístico da nosa comarca".

O punto e final á camiñata púxoselle cunha misa no santuario da Virxe da Barca, en Muxía, onde se congregaron unhas cento cincuenta persoas, que abarrotaron a igrexa. Alí, foille entregado un agasallo a José Antonio de la Riera, membro da Asociación de Amigos do Camiño. Tódolos participantes na peregrinación recibiron a Fisterrana acreditativa. Plácido Gracía insinuou a posibilidade de que o vindeiro ano tamén lles sexa entregado un documento en Muxía, que podería leva-lo nome de muxiana.

NA COSTA DA MORTE, HAI MOITO QUE VER !!!

Lugares	Natureza	Lecer	Contos	Pousada	Economía

Feito da man de Abertal Información : costadamorte@finisterrae.com