Ramón Caamaño é un dos primeiros fotógrafos que retratou a fermosísima Costa da Morte e as súas xentes. Era o ano 1925 e polas rúas de Muxía sacaba fotografías Moncho un rapaz de 17 anos que xa comenzaba daquela a dar os seus primeiros pasos no mundo da fotografía.

'Un día en Corcubión púxenme un día a contar as miñas fotografías e contei 7.000', confesaba Ramón o pasado mércores no programa de radio Vivindo a Costa da Morte. Fotografías repartidas en varias habitacións da súa vivenda e das que moi pronto todos poderemos admirar. Será en xaneiro do vindeiro ano cando O Museo Ramón Caamaño abrirá as súas portas. Ubicado en Muxía este museo non só terá miles de fotografías súas senón tamén obxetos personais deste fotógrafo como a petaca que mercou cando tiña 8 anos. A súa nai enterouse de que el e outros compañeiros da súa escola, para facerse homes, fumaban as colillas que tiraban os mariñeiros, e para que non o fixera máis doulle a Ramón unha peseta para que mercara tabaco 'limpo'. Moncho coa nova petaca fumou un pitillo tras outro e pillou tal borracheira que dende ese momento non voltou a fumar un pitillo.

Ramón ven de recibir un galardón de honra do premio de fotografía Luis Ksado, galardón do que se sinte moi orgulloso, aínda que non é o único premio deste home tan simpático que dentro de moi poucos días cumprirá 92 anos. El confesa que cada ano que pasa as súas festas de cumpreanos son cada vez mellores.

Se vostede o desexa pode mercar o libro da súa vida na rede.